സന്ദേഹ കാവ്യം

(മഞ്ചേരിയിൽ നിന്നു പ്രസിദ്ധീകരിച്ചിരുന്ന ‘സഹൃദയ’ മാസികയുടെ മെയ് 2008 ലക്കത്തിൽ അടിച്ചു വന്ന എന്റെ മറ്റൊരു പൊട്ടക്കവിത)

കാവ്യത്തിന്റെ പാത്രത്തിലിട്ട്

വേവിച്ചൊരു എഴുത്ത് കയ്യിൽ കിട്ടി.

(ഇന്നങ്ങാടിയിൽ കിട്ടുന്നതിലേതാ

മൂത്ത് പഴുത്തത്? ഏതാ ഞെക്കിപ്പഴുപ്പിച്ചത്? അറിയില്ലല്ലോ)

വെന്തോ? വെന്തില്ലേ;

ചൂടോടെ കുടിക്കാൻ തുടങ്ങി.

കുടിച്ചു തീരുന്നതിനൊപ്പം

അതിന്റെ ചൂടും തണിഞ്ഞു.

അവസാനം ഗ്ലാസിന്നടിയിലെ

ഇത്തിരി തണുത്ത ചായബാക്കി പോലെ

അതുപേക്ഷിച്ചു.

ഒരു പക്ഷെ കുടിക്കാതെ തൂവിക്കളയുന്ന

ബാക്കിയിലാവാം കവിത.

വായിച്ചതിലെവിടെയാണു കവിത?

വായിക്കാത്തതിലാവാം കവിത.

ഈ എഴുത്തിലെവിടെയാണു കവിത?

എഴുതാത്തതിലാവാം കവിത.